نوتة

متخيلتش اني ممكن اتضايق كده

لما حطيت ايدي في جيب البنطلون وانا في مشوار وملقتش النوتة الصغيرة بتاعتي

نوتة بدأت اكتب فيها من كام شهر

ميزتها في صغر سنها .. بالنسبالنا يعني حجمها

ده غير القلم الميكرو اللي مرتبط فيها

بس مش ديه الفكرة

الفكرة اني عودت نفسي من فترة

 لما فكرة في خيالي تمسكني او خاطرة تيجي علي بالي

ومتلاقيش مكان علي ارض الواقع 

لأني مانعها من الظهور

او كاتمها جوايا لسبب جوايا

كنت ساعات باروح مادد ايدي مطلعها 

حتي لو واقف في محل او في الطريق

واسحب القلم واكتب سطر او سطرين

في محاولة مني

لتسجيل ذكري

او

للتأقلم مع دماغي

اللي عارف انه مش حيسيبني

وساعتها حيعذبني

واروح مرجعها الجيب تاني

الحمد لله

لما رجعت البيت ادور

طلعت كنت مهتم بيها زيادة

لدرجة اني كنت محتفظ بيها في مكان احسن مش معتاد

فلما لقيتها حسيت اني لقيت مليون جنيه

:)