خواطر مسافر
ربما هذا ايضا يصبح عنوانا جديدا اكتب تحته خواطرا جالت بخاطري لاذكر نفسي بان الانسان ما هو الا مسافر او عابر سبيل في هذه الارض والدنيا
-------------------
في اوقات الانسان بيتاثر بشكل مميز بالقرآن
او بمتتابعة لحظات ايمانية معينة
زي مثلا صلاة خاشعة يتخللها درس ديني مميز ويعقبها دعاء محسوس وتنتهي بقراءة متأنية للقرآن
فتكون المحصلة هي شعور جميل من لذة الايمان
او شعور بان الانسان في لحظة معينة اقرب باحساسه من ربنا
زي ما تكون حاسس انك قربت من ربنا في اللحظة ديه بروحك اكتر من اي وقت فات عليك
بتحس ان روحك اللي جواك بقت اخف
وبان جسمك مبقاش شايل نفس عدد الكيلوجرامات اللي كان بيحس بيها عبء عليه
بل بالعكس الروح هي اللي كأنها بتشيل الجسم
وتحس ان روحك من جوا صدرك طافية لفوق
او عايزة تطلع منك وتطير بيك لفوق قوي
زي لما تبقي ماسك بالونة هيليوم وعايزة تطلع لاعلي
بس تخيل البالونة الهيليوم ديه عايشة جوا صدرك
ففي اللحظة ديه بتحس ان في شعور ماليك بس الشعور ده طافي جواك
:)
أيوة طافي
وجه علي بالي مثال يمكن غريب شوية يعبر عنه
حد جرب قبل كده يجيب بالونة عادية ويحاول يغرقها في المياة او في البحر؟
او البورد بتاع السباحة
حد جرب يضغط عليه ويغرقه تحت المياة؟
بتحس بايه؟؟؟
بانه بيزقك لفوق
:)
انا يتهيألي هو ده نفس الشعور اللي ممكن الانسان يحس بيه في لحظات معينة بعد قراءة القرآن
ويمكن ده اكتر مثال جه علي بالي يوصف الشعور
هو ان الروح بيبقي عندها قوة طفو تطفو بيك جوا صدرك لدرجة انك ممكن تحس بيها جوا زورك
وطاقة الطفو الايمانية مبتجيش غير بالقرب من ربنا
لان الطفو الايماني هو ان الروح عايزة ترتقي وتسمو لأعلي ناحية اللي خلقها
فالانسان لما بيغذيها بالطاقة الايمانية بتاخده معاها فوق
وفي هذا درب من لذة الايمان
2 COMMENTS:
الله !!! :)
.. H.G.
Thanks ^_^
Post a Comment