النهارده رغم احداث كتيرة معظمها رمادي
الا ان اكثرها تاثيرا فيا هيا ضياع ذكري
يمكن انا باكتب دلوقتي البوست ديه بهدفين
الهدف الاول هوا محاولة لتوثيق هذه الذكري حتي لا تصير طي النسيان مهما عفي عليها الزمن
التاني بغرض النصيحة بس حاخليها في الاخر
جدي الله يرحمه اللي من طرف والدي كان يملك ساعة من النوع اللي لا يحتاج الي بطارية او حجر ساعة
و مجرد الحركة البسيطة للانسان اللي يرتديها تكفي الزنبرك الداخلي لهذه الساعة انه يتحرك و يحرك معاه عقارب الساعة و انه يغير تاريخ اليوم
الساعة شكلها قيم و فيه شيء من روح الاصالة و اللون الفضي اللي تحس انه بيقاوم الزمن و انه مهما حصل لن يصدأ لأن معدنه متقن الصنع
الساعة ديه فكرتها رغم بساطتها الا انها عجبتني جدا و ان مجرد الحركة تشحنها
و يترتب عليه اني اخدتها من والدي لأني باحب اجمع الذكريات حتي و لو كانت من تانية حضانة لأن مجرد النظر ليها ممكن يفكرك بمعني او بمبدأ او بشخص عزيز و كان قريب منك في يوم من الايام لكن الظروف و و و و
النهارده و انا نازل لقيتها قدامي رحت لابسها و نازل بيها
و حدث ما لم يحمد عقباه
شكلي و انا باتوضي في جامع في السكة أضعتها مني
شعور بايخ لما تيجي تبص علي الساعة في ايدك تلاقي مكانها فراغ
اللي الساعة متعرفهوش انها سببت فراغ في ايدي و فراغ في حتة في قلبي
مزيج من الاسبهلال و عدم التصديق لبضع ثوان انتابني
حاجة مش حلوة ان ذكري تضيع
لأن لما يكون الحاجة اللي بتفكرك بحاجة بتضيع
فايه اللي حيفكرك بالحاجة اللي كانت بتفكرك بحاجة
:)
...
النصيحة :
اوعوا لو في حاجة عزيزة عليكم تعاملوها في وقت من الاوقات علي انها حاجة من المألوفات و تنسوا قيمتها
لأن ممكن مع مرور الايام تفتكروا انها حاجة عادية و متحسوش بقيمتها الا بعد ما تختفي
5 COMMENTS:
السلام عليكم،،
بداية ربنا يعوض عليك وأود أن أقول بشدة لا تحزن
:)
وإن كان الشيء القيم ضاع ماديصا فلا تدعه يضيع معنويًا أو تجعل حزنك يمسه.
نصيحة حضرتك دقيقة ورائعة وغاية في الصحة أعجبتني جد
ًا لأنني أحسستها كثيرًا وودت التعليق منذ أمس فور نزول البوست ولكن النور انقطع !
جزاك الله كل خير د. شريف
وأكرر..لا تحزن
:)
و عليكم السلام
اكيد الحزن حيبقي وقتي
لان للاسف او مش للاسف ان حتي شعور الحزن ده مع مرور الوقت حيتنسي و يتنسي معاه كل ما يتعلق بالذكري فعشان كدا دونتها و ديه ميزة باحسها في التدوين انها بترصد حاجات ممكن احنا ننساها فلو حبينا حاجة تفكرنا فهي حتساعدنا بالكلمات اللي كتبناها فيها في وقت من الاوقات
أحمد الله أن لربما تكون هذه الكلمات قد غيرت من نظرتكم تجاه شيء او اكثر كنتم قد غفلتم عنه
جزانا و اياكم يا دكتور
و شكرا علي لفتتك الطيبة
:)
السلام عليكم و رحمه الله و بركاته
اد ايه البوست ده مسنى شخصياً !
الحاجات القديمه او الذكريات و الحاجات اللى بتفكرك بيها ليها مكانه خاصه عندى
بس الحقيقه انى بختلف مع حضرتك
انى بشيلها فى مكان امين جداً
لا تصل اليه يد
حتى يدى انا !!!
بس لما بدعبس و الاقى الحاجه دى ..
يااااااااه اد ايه بيبقى الشعور جميل
ان تكون لاقيت حاجه شكلها و معناها معاً ليهم مكانه خاصه لديك ..
و تبتدى سلسله الذكريات المرتبطه بالشيىء ده تنسحب ببطىء لتطفوا على سطح كومه الذكريات داخل المخ البشرى ..
لكن مش دايماً نحتاج حاجه عشان تفكرنا بالحاجه اللى بنحبها ..
ساعات بنقدر نفتكرها لوحدنا
ده ما ينفيش زعلنا لضياع الشيىء المذكر ...
لكن فى نفس الوقت زى ما حضرتك ذكرت
ممكن نخلى حاجه تفكرنا بالحاجه اللى كانت بتفكرنا بالحاجه اللى بنحبها
:)
@ Dr Alex :-
و عليكم السلام و رحمة الله و بركاته
احم
مانا حرمت من بعدها
:D
و لكي الحق كله في هذا
انا فعلا في حاجات حاططها في حصالة من اللي بقفل و بغض النظر عن اني شايل القفل ^_^ الا اني مجمع فيها جزء من حاجات ابتدائي و حضانة و حاططها في اعلي رف في المكتبة و كل ماجي ارتب او انقل حاجة من مكانها اقوم افتحها شوية و اقفلها تاني
و حاجات تانية بدات احدها اسكانر و هكذا
و فعلا ساعات بنقدر نفتكر لوحدنا
بس زي ماحضرتك قولتي
س ا ع ا ت
:)
انا حسيت من كلماتك البسيطة اللي مفيهاش تكلف قد ايه الساعة دي كانت غالية عندك.. :):
لدرجة اني حسيت بإحساس "يا ريته ما نزل بيها.. قدر الله وما شاء فعل"
مبحبش ابدا إحساس الندم على حاجة بعد ما تضيع.. علشان كده عندي دايما حركة غصب عني بعملها لما اكون في اي مكان.. اني ابص ورايا كويس لو نسيت حاجة.. حتى لو مكنتش فتحت الشنطة اصلا و حتى لو مكنش معايا حاجة.. لدرجة اني ببص في الاسانسير و انا طالعة منه
:-D
الذكريات مهمة جدا فعلا و بتبقى غالية قوي و ليها قيمة معنوية أقوى من اي قيمة مادية
و فكرتني بساعة عند ابي بتتشحن بالطريقة دي برضه و كان بيخليني امسكها احركها شوية علشان تتشحن و بعدين ارجعلهاله
:-)
و النصيحة اللي كتبتها فعلا هي الخلاصة.. خلاصة التعامل مع كل حاجة حتى البشر
لان البشر هما أغلى حاجة ممكن تبقى في ايدينا و منقدرهاش
:))
Post a Comment