الموضوع ده كنت ناوي اكتب عنه من اول ما فتحت البلوج في اولي صيدلة
الا وهو السباب
وليس الشباب
مانسيتش انا ال 3 نقط اللي فوق السين
^_^
رغم وجود علاقة طردية بين السباب والشباب
..
اذكر بدايتي مع الظاهرة ديه كانت في اولي اعدادي
وديه كانت اول سنة ليا في مدرسة حكومية مش خاصة
وكانت بمثابة اول سنة واقعية
ورغم انها كانت افضل مدرسة للمتفوقين بنين في اسكندرية وكان دخولها بالمجموع
الا اني شفت فيها نقلة حضارية غير عادية في اخلاق الطلاب
^&^
انا فاكر ان كان الفرق شاسع جدا
كأن مرة واحدة بقي في ضوضاء سمعية
شتايم الاب والام والاعراض كانت بتنتقل بكل سلاسة من أي واحد لأي واحد تاني
ومن الشرق للغرب
ومن الشمال للجنوب
ومن المعلم للتلميذ
!
ومن التلميذ للمعلم ساعات
!!
..
وكان من رابع المستحيلات ان الواحد يتساب في حاله لو مبيستخدمش السلاح ده مع اللي حواليه
..
----------------------------------------------------
أصل يعني حتشتم ولا عامل نفسك فافي بقي وكدا؟
!!!!!!!
أصل الشباب النايتي بس هما اللي مبيشتموش
:))))
ولا انت بقي مش راجل وبتتكسف تقوله في وشه انه ابن ال
******
وابن
********
والناس كلها عارفة انه ابن
ال*****
او ايه ده؟؟ انت متعرفش اخر شتيمة مركبة بتتقال دلوقتي هيا ايه؟
( شتيمة تشمل 3 اجيال من النسب في جملة واحدة )
طب بص بقي الشتمية الجديدة ديه
:
*** ******* *** *****
ومش حيعرف يرد عليك فيها ديه يا معلم
:)))
----------------------------------------------------
الكام جملة اللي فاتوا كانوا عينة من لسان حال الولاد مع بعضهم في اي فصل مهما كان اللي جواه مؤدب ومحترم
لان في فترة المراهقة ديه
تقدروا تقولوا ان الشتيمة تعتبر هي مقياس للقوة والروشنة
او
مقياس للوضع الاجتماعي ومين بيفرض سيطرته علي التاني
او
مقياس للرجولة عند الكثيرين
!!!
المشكلة الكبيرة مش في انها في الفترة ديه كانت كده
لأ
المشكلة ان غالبية الولاد بينشأوا علي الموضوع ده ويستفحل معاهم في ثانوي ويستمر بيها بقية حياته العادية
..
اتذكر اني كنت باحس اني باحارب ايام اعدادي
فعلا مش هزار
كانت بالنسبالي كانها حرب
ان ازاي حافرض سيطرتي علي اللي حواليا وماكونش ضعيف وفي نفس الوقت ما اقولش اي لفظ من الالفاظ اللي كانت جديدة عليا وباسمعها وبيشجعوني اني ادمنها
كانت حرب ازاي انضف وداني
كانت حرب ازاي اتريق علي اللي حواليا واللي بيشتموا وميحسبوش ان ده ضعف مني علي الاطلاق
كانت حرب ان ازاي تخلي الناس تحترمك في وسط هيصة الغوغاء ديه وان ازاي تخلي اللي بيكلمك يحترم الكلام اثناء مانت واقف معاه علي الاقل
والحمد لله نجحت بيني وبين نفسي بتقدير امتياز في اني اعدي المرحلة ديه من غير ما لساني يتوسخ او تلزق فيه الحروف ديه لبقية العمر
كنت باحس ان الموضوع عامل زي ميثاق شرف للانسان بينه وبين ونفسه
وان اللسان الراقي النضيف حيعيش طول عمره نضيف
لكن اللسان اللي قدر ينطق كلمات معينة ويتلفظ بحروفها ولو هزار في قعدة رجالية ، فساعتها كأن بكارة اللسان ده انتهت حتي لو كان قدام الناس شكله حلو لكن بينه وبين اللي يعرفوه لسانه متعود ع الشتيمة
!
...
للاسف مجتمعنا نسبة الشتيمة فيه عالية جدا
ومابين الرجالة وبعضهم الشتيمة عاملة زي اللبان او تحلية الكلام
انا لو قلت نسبة الرجالة او الولاد اللي بينطقوا شتايم حتكون نسبة مخيفة
يعني ممكن من كل 20 ولد يكون في 2 او 3 بالكتير جدا اللي مبيشتموش
لان اللي البنات متعرفهوش هو ان في ولاد كتيرة جدا بيبان ان كلامهم كله محترم
لكن لما بتكون قعدة رجالي ما بين الصحاب وبعضهم بيكون كلامهم حاجة تانية نهائي
:)
وساعات ما بيصدقوا ، ان كده بقي في حرية في الكلام ويقدروا يعبروا عن نفسهم زي ما يحبوا من غير الكلام المتزوق قدام الناس
والشتيمة بقت تستخدم لاغراض كتيرة
منها الشتيمة الحقيقية
ومنها لوصف الاشياء
زي كتير لما يحبوا يعبروا عن حاجة عاجباهم قوي فيدخلوا في نص الجملة كلمة كذا ابن ال**** او كذا بنت ال**** ده جامد جدا
ومنها هزار
زي ولاد كتيرة بيعتبروا الشتيمة ما بينهم مديح وبتدل علي مدي قرب علاقتهم ببعضهم
-------------
يمكن من اكتر الاسباب اللي بتخلي اي واحد يتعود علي الشتيمة هو
:
1-
لو الاب متعود يشتم
فساعتها الابن تلقائيا بيحس ان اللي بيعمله ده هو الصح ومش غلط فيبدأ يقلده حتي ولو برا البيت بس مع الاصدقاء
2-
لو صحابه متعودين علي الشتيمة
او زي ما بنقول رفقة السوء
لان ساعتها بيبقي شكله وحش ما بينهم انهم بيشتموا وهوا لأ ومش حيعرف يتأقلم معاهم في كلامهم
ففي الغالب بيتعود الشتيمة زيهم عشان ميخسرش صحابه ويكون جدع
:)))
---------------
عن عبدالله بن عمرو رضي الله عنهما، قال: قال رسول الله صلى الله عليه وسلم: {إن من أكبر الكبائر أن يلعن الرجل والديه؟ قيل: يا رسول الله! وكيف يلعن الرجل والديه؟! قال: يسب الرجل أبا الرجل فيسب أباه، ويسب أمه فيسب أمه }
صدق رسول الله صلي الله عليه وسلم
لان من اكتر الحاجات اللي كانت بتخلي واحد يشتم حتي لو مبيشتمش هوا انه يتشتم بالاب او الام
فيفكر يرد للي قدامه نفس الشتيمة عشان مفيش اب احسن من اب ولا ام احسن من ام وعليا وعلي أعدائي
وده تفكير ناس كتيرة
لكن لو فعلا اللي بيشتم فهم معني الحديث وحس بيه مكنش زمانه كمل واتعود علي الموضوع ده
لانه بيقبل علي نفسه انه بيشتم والده او والدته اللي ربوه نتيجة انه بيشتم الناس بالاب والام فالناس ترجع تشتمه شخصيا بنفس الشتيمة
------------------
في افلام كتيرة ومسلسلات كتيرة بقت الالفاظ الخارجة بتدخل في النص عشان يحسسوا الناس ان كده الفيلم بقي واقعي وان هيا ديه سمة العصر
بس علي العكس من ده
في فيلم احمد حلمي بتاع اسف علي الازعاج
كان في جزء هزار في الفيلم بتاع انه كل شوية واحد يتصل بيه علي السماعة ويشتمه فبدل ما نسمع الشتيمة نسمع "تيييييت" وكل شوية يتم استبدال الشتيمة ب "تيييت" غير صريحة
يمكن ديه ميزة حصلت وخلت ناس كتيرة رغم الهزار اللي في الموضوع
الا ان مصريين كثيرين بدأوا لما يحبوا يشتموا حاجة يقولوا تيييت بدل الشتيمة الحقيقية
فالموضوع ده رغم انه كان باديء هزار الا ان الحمد لله انتهي بفكرة مجتمعية بديلة عن الشتايم الحقيقية
فبقينا لما عايزين نعبر عن مدي استياءنا من حاجة نقول ان كذا ديه حاجة تيييييت
:)
ونستخدم الكلمة ديه لتوصيل الفكرة وعدم استخدام الالفاظ الجارحة
ازاي اللي بيشتم ضميره مبيوجعهوش وهو بينطق حرف حرف من الشتيمة ؟
وازاي مبيفكرش انه بيأذي ودان اللي حواليه ؟؟
وازاي ناس محترمة بتبرر لنفسها !!! ان لازم يشتموا في مواقف معينة ومع ناس معينين وكأن هو ده الصح ان الواحد يتعامل مع المحترم باحترام ومع قليل الادب بشتيمة ؟
اساسا الانسان قليل الادب بيكون خسارة انه يتشتم لسببين
الاولاني هو ان حرام الواحد ياخد ذنوب في واحد زي ده
الثاني هو ان حرام الواحد ينزل مستواه للمستوي ده من الاخلاق واللي قدامه يجرجره للشتيمة
الواحد لازم يرد عليهم باسلوب تاني ويعلمهم الادب لكن مش بالشتيمة زيهم يعني
لم يكن رسول الله صلى الله عليه وسلم فاحشاً ولا متفحشاً ، ولا لعاناً وكان يقول: ( إنَّ مِن خِياركم أحسَنكم أخلاقاً ) . « متفق عليه »
ـ وعن أنس قال : لم يكن رسول الله صلى الله عليه وسلم فاحشاً ولا لعاناً ولا سَباباً ، وكان يقول عند المعتبة [ المعاتبة ] : مالَـهُ تَرِبَ جَبينُه ؟!
[ ترب جبينه : كلمة تقال عند التعجب ]. « رواه البخاري »
ـ كان رسول الله صلى الله عليه وسلم ، أحسنَ الناس وجهاً ، وأحسنَهم خُلُقاً .
« رواه البخاري »
ـ وعن أبي هريرة رضي الله عنه قال : قيل يا رسول الله : اُدع على المشركين، قال: ( إنّي لم أُبعثْ لَعّاناً ، وإنما بُعثتُ رحمة ).
« رواه مسلم »
قال الرسول صلى اللّه عليه وسلم: { إن أقربكم مني مجلساً يوم القيامة أحسنكم أخلاقاً }
[رواه أحمد والترمذي وابن حبان]
. يقول الشيخ عبدالملك القاسم: مكارم الأخلاق صفة من صفات الأنبياء والصديقين والصالحين، بها تُنال الدرجات، وتُرفع المقامات. وقد خص اللّه جل وعلا نبيه محمداً صلى اللّه عليه وسلم بآية جمعت له محامد الأخلاق ومحاسن الآداب فقال جل وعلا: وَإِنَّكَ لَعَلى خُلُقٍ عَظِيمٍ [القلم:4].
------------------
عادة من أسوء العادات هي عدم التحكم في الفاظ اللسان
..
والمشكلة ان اي ولد بيكون عارف هيا قد ايه مستشرية في المجتمع بشكل حقيقي لكن ناس كتيرة بتزوق كلامها عشان ميتعرفش انها بيشتم
انا ياما قابلت ناس كنت باحسب ان استحالة يشتموا لكن مع المعاملة في مواقف مختلفة كنت بالاقيهم بيستخدموا الشتيمة في كلامهم فتنزل صورتهم في عينيا تاني
وأكتر حاجة باكرهها هي لو اتعرفت علي حد من المديرين واكتشف انه كلامه فيه شتيمة عشان يحاول يحسسنا كشباب انه قريب مننا
!
مرض الوهم
بس اهتمام النشأة والبيت ليه أهم دور في ان الشتيمة متبقاش جزء من كلام ابنهم المعتاد برا البيت
الاب والام والضمير والتعليم والدين
خمس عوامل لازم نهتم بيهم في المستقبل عشان نطلع جيل راقي بأخلاقه نقدر نفتخر بيه وباحترامه ويكون الاحترام والاخلاق بالوراثة جيل بعد جيل في الاسر المسلمة
رغم ان الحاضر مظلم في الموضوع ده في اماكن كتيرة وناس كتيرة
بس انا متفائل بمستقبل افضل واهم صفاته الرقي الاخلاقي
مصر المستقبل .. ان شاء الله احسن بمراحل
بايدينا باذن الله
