في حقيقة بتقول
ان القطط اصلا كائنات تستاهل تتحب
ههههههههههه
انا عن نفسي شايف كده
^&^
وفي الواقع جارتنا في العمارة في الدور بتاعنا بتحب القطط
^_^
بس لديها اهتمام فائق بهم
فبتربي عندها سلالات من القطط في الشقة
ويمكن عدم وجود اولاد في الشقة عندها مساعدها علي الاهتمام وتربية اعداد كبيرة من القطط
فمن وقت للتاني كنا بناخد رايها في التعامل مع القط بتاعنا توتو من كام سنة
وبعدها بقينا بناخد من عندها كام قطة في شقتنا نلعب معاهم بالوانهم المختلفة لحد ما تاخدهم تاني
^__^
النهارده بقي
جابتلنا قطة صغنونة مجتش عندنا الشقة قبل كده
:)
كانت ماشاء الله جميلة قوي ومزيج الوانها كان بين البيج الفاتح والابيض
ودخلتها اودتي والمفروض اقعدها معايا عشان متجريش في الشقة تحت الكنب او تحت الكراسي وتفضل مستخبية لو فلتت من ايدينا
^___^
المشكلة ان القطط لما بتروح بيت مش بيتها بتبقي خايفة جدا
سواء من ناس اول مرة تتعامل معاهم وغرباء بالنسبة ليها
او سواء من اماكن اول مرة تشوفها وملعبتش فيها قبل كده ومش متعودة عليها
فلما تيجي تمسكها تلاقيها تقعد تهرب من ايديك وعايزة تنط وتنونو بشكل هستيري وتبدأ مخالبها تبان من وسط ايديها ورجليها
^____^
بس في ميزة الصراحة في القطط الصغيرة
انا باحسهم عاملين زي الاطفال النونو
:)
سهل انك تتحكم فيهم لو بتعرف تتعامل معاهم وتلاعبهم
انا فرحت بحاجة الصراحة
ههههههههه
ان بعد ما كانت عايزة تخربشني عشان تنط وتهرب في اول كام مرة كنت شايلها فيها
قعدت الاعبها واهديها
لحد ما وصلت انها نامت في ايدي
^_____^
حسيت اني نجحت في تحدي عملته بيني وبين نفسي
ان القطة الصغنونة ديه بعد ما كانت بتهرب مني وخايفة
ازاي اهديها زي الاطفال واخليها توصل لدرجة من الطمأنينة انها انها تنام في ايديا
رغم انها كانت حاجة مش كبيرة
بس فرحتني
:)
بالذات لما تأملتها وهيا نايمة بكل هدوء ماشاء الله عليها من بعد خوفها
واللي فرحني اكتر اني سمعت منها وهيا نايمة صوت ال
errrrrrrr
ويمكن ده صوت عارفينه اللي بيربو قطط
الصوت ده بيطلع من القطط لما تكون مبسوطة او فرحانة
يتهيألي بيبقي جاي من اهتزاز احبالها الصوتية بشكل هادي
كم ان القطط وديعة
تكاد تكون افضل كائن حي من بعد الانسان يمكنك ان تستمتع برعايته كانه طفلك الصغير
:)
0 COMMENTS:
Post a Comment